الروح هي العلم

جزء عجبني قوي من حلقات الدكتور العظيم مصطفى محمود كان فيه بيتكلم عن الأطباق الطائرة والتقدم التكنولوجي العظيم اللي وصلتله أمريكا وروسيا أخدت الجزء ده منه علشان نستفيد ونعيد ترتيب أوراقنا تاني

"واضح ان المستقبل بيتنسج عن طريق 3 علوم .. علوم خطيرة هي اللي حتشكل المستقبل ال Cooling Gynics (علوم التبريد)، وال Super Conductors (صناعة السبايك اللي حكينا عنها)، وأخيراً ال Gravity Field Energy . المستقبل بيتعمل نتيجة التلاحم بين التلات علوم دي. طيب احنا فين من كل ده ؟!! ... احنا مشغولين باللقمة والزحمة وإطعام البدن .. كويس مافيش مانع إطعام البدن لكن البدن محتاج لروح جواه، والروح اللي جوا البدن هي العلم بالإكتشاف والإختراع.

الرغيف اللي باكله ممكن يساعدني أعدي الشارع يديني الطاقة أعدي بيها الشارع لكن العلم حيديني الطاقة أعدي بيها الفضاء وأروح للكواكب والنجوم، والهندسة الوراثية حتخليني أعمل بدل الرغيف 100000 رغيف . وأخلي الحبوب ترمي بدل المحصول 20 ضعف المحصول . فالعلم هو الروح ..... إحنا فين؟؟؟ إحنا فين من ده كله ؟؟. العلماء لازم ياخدوا بإيدنا ويدخلونا للعصر ده علشان يبقى إسمنا أبناء العصر وأبناء الوقت. مانبقاش عايشين في القرن الثامن عشر... مش ممكن !!

إذا كان مافيش فلوس علشان نعمل مختبرات نستلف. طيب ماحنا بنستلف علشان الرغيف هنا من باب أولى نستلف علشان نعمل مختبرات علمية. إذا كان مافيش علماء نستلف علماء مش عيب. طيب ماهو أمريكا أستلفت علماء من ألمانيا علشان يزرعوا الفضاء هناك وناسا والصواريخ والحاجات دي، وروسيا خطفت العلماء الألمان وقعدتهم وفرغتهم علشان يعملوا نظام الصواريخ وعلوم الفضاء. مش عيب نستلف علماء لكن لازم نعمل حاجة لأن الدنيا بتجري واحنا واقفين ... عاوز أقول وءأكد تاني أن في النهاية آه إطعام البدن آه مهم لكن البدن محتاج لروح والروح هي العلم والإكتشاف والإختراع."

يا رب كله يستفاد ورابط الفيديو هنا

http://www.youtube.com/watch?v=ZMVELLpxPqo

الأفيون المغشوش

في مصر دلوقتي صعب انك تلاقي الضمير في اي حاجه لا أكل ولا شرب ولا رقص حتى الأفيون اللي كانوا بيخدروا بيه العقول بقى مضروب هو كمان وقبل ماحد يفكر اني بتكلم عن الأفيون بتاع التعاطي أوضح بس أنه الأفيون ده افيون جديد أفيون على إيد منى ومعتز الدمرداش وعمرو أديب وإبراهيم عيسى وووو .. الأفيون ده هو أفيون الإعلام ... زمان كان الأفيون بيخدر العقول عن اللي بيحصل ماكانش في غير القناه الأولى والتانيه كنت تلاقي الناس كلها مالهاش كلام غير في نفس الحاجه كله ليه نفس التوجهات والأذواق أصل المخدر كان بيتوزع على الجميع بنفس الجرعة .. كان زمان تقول للواحد شفت فيلم امبارح من غير ما يسأل فيلم ايه يجاوب أيوه شفته أو ماشفتوش وحيسأل ليه ما هما قناتين ومعروف لو القناه الأولى جايبه فيلم التانيه برنامج غلس والعكس ما علينا من كل ده دلوقتي خلاص كله باين واللعب على المكشوف المشكلة بقى اني بجد نفسي أعرف هل الناس دي مقتنعه بالكلام اللي بيقولوه ده؟؟ يعني راضيين عن المسرحية اللي بيقوموا فيها بدور البطوله ومقتنعين ان جمهور الصاله مصدقهم ؟؟ الغريبه إني كنت فاكر كل الناس بتفكر زيي وكلهم فاهمين ان الأفيون اللي بيقدموه ده مغشوش وانها مش حتدخل علينا لما يعيطوا ويصرخوا ويتألموا لحال الشعب وجيوبهم مليانه وبطونهم شبعانه (والله مش حقد طبقي) المهم اللي أكتشفته ان معظم الشعب غلبان ومش عايز أقول أهبل نمشيها على نياته فاكرين ان الناس دي قلبها على البلد وعلى الغلابه اللي بيموتوا كل يوم من الإهمال والفقر وقلة الحيله مش شرط الموت الإكلينيكي يا ريت يسمع من بقك ربنا كفايه انك تموت كل يوم ألف مره من الإهانات وطحن الفقر وقلة ذات اليد. كنت فاكر ان الأفيون مغشوش بس أكتشفت اننا كلنا غرقنا فيه غصب عننا علشان كده الكبار متطمنين ومترستأين ومتأكين إن اللي في غيبوبه ما يقدرش يعمل حاجه أقصى حاجه انه يتنح للشاشه من بعد العصر لغاية الساعة 2 بالليل وبقه مفتوح ياخد الجرعة بتاعة كل يوم واديها نوم لتاني يوم. يا جماعة أمتى حنفوق ؟؟ إمتى ؟؟